სამშაბათი, 2024-03-19, 6:04 AM
BEST SITE
საიტის მენიუ
მინი-ჩეთი
300
ჩვენი გამოკითხვა
შეაფასეთ საიტი
სულ პასუხი: 286
სტატისტიკა

სულ ონლაინში: 1
სტუმარი: 1
მომხმარებელი: 0
შესვლის ფორმა
დიეტა მოგზაურებისთვის


ყოველთვის, შვებულებაში წასვლის წინ, ვპირდებით საკუთარ თავს, რომ იქ – პლაჟებზე თუ თვალწარმტაც ქალაქებში, ყველაფერი სხვაგვარად იქნება – და ჩვენ დავიწყებთ სწორად კვებას. მაგრამ ყოველთვის თვითმფრინავში ჩაჯდომისთანავე ვარღვევთ პირობას. ჩვენ გაგანდობთ იმ საიდუმლოს, თუ როგორ შეინარჩუნოთ დიეტა და ამავე დროს, სიამოვნება მიიღოთ მოგზაურობისგან.

კვების რეჟიმის დარღვევის მთავარი მიზეზი ხშირ შემთხვევაში ფულისა და დროის ეკონომიაა. ასევე, დიდ როლს თამაშობს ადგილობრივი მაცდუნებელი დელიკატესების გასინჯვის სურვილი. საინტერესოა, რომ ზოგიერთ ტურისტს კუჭთან დაკავშირებული პრობლემები ჯერ კიდევ დანიშნულების ადგილზე ჩასვლამდე – თვითმფრინავში ან აეროპორტშივე ეწყება.

არ დაივიწყოთ წყალი
თავის ტკივილი, კუჭზე პრობლემები, დაღლილობა, შიმშილი. ყველა ეს ნიშან-თვისება შესაძლოა ერთ პრობლემას – გაუწყლოვებას მივეკუთვნოთ. იმისათვის, რომ მისგან თავი დაიცვათ, საჭიროა ყოველ საათში ერთხელ სვათ რამდენიმე ყლუპი წყალი – განსაკუთრებით, თვითმფრინავში. თავი შეიკავეთ ყავისა და ენერგეტიკული სასმელებისგან – ისინი აუწყლოვანებენ ორგანიზმს. ვერანაირი გაზიანი და სოდიანი სასმელი, რომელსაც ხშირად გვთავაზობენ ბორტზე, ვერ შეცვლის წყალს. არც ხილის წვენია უკეთესი საშუალება. და ბოლოს, ალკოჰოლი – ეს არის მთავარი რამ, რაზეც უნდა თქვათ „არა" თვითმფრინავში. ზოგიერთები ფიქრობენ, რომ ის დაძინებაში ეხმარებათ. შესაძლოა. სამაგიეროდ, გაღვიძება არ გაგახარებთ.

ცილა და უჯრედისი
სწორედ ამ ნივთიერებებით მდიდარ პროდუქტებს უნდა მიანიჭოთ უპირატესობა საერთოდ და განსაკუთრებით, მოგზაურობისას. ალბათ, არასოდეს მოგსვლიათ აზრად, გამგზავრებისას თან წაგეღოთ მშრალი შვრიის რამდენიმე პაკეტი? სულ ტყუილად. მის ცხელ წყალში გასახსნელად შეგიძლიათ სტიუარდესას ან აეროპორტის კაფეს ზრდილობიან ბარმენს მიმართოთ და თქვენს ხელთაა იდეალური ცხელი სნეკი! თუ თან წყლიან ხილს ან ბოსტნეულსაც წაიღებთ, მგზავრობის მანძილზე საუკეთესო შეგრძნება უზრუნველყოფილი გექნებათ.

ცილებით მდიდარი დიეტა ტკბილეულის მიმართ ნაკლებ მოთხოვნილებას განაპირობებს. ამიტომ მოგზაურობისას მიირთვით (თან წაიღეთ) ყველი, ძროხის ან ინდაურის ხორცის ვიტჩინა, არაქისის კარაქის ბუტერბროდები მარცვლეულის პურზე. მხოლოდ, უფრთხილდით პროტეინიან ბატონებს (სხვადასხვა სახის მუსებს შოკოლადში, იოგურტსა თუ სხვა რამეში). ისინი დიდი რაოდენობის შაქარს შეიცავენ.

არსებობს დიეტოლოგთა „ოქროს წესი": 80 % იმ პროდუქტისა, რომელსაც მიირთმევთ, აუცილებლად უნდა იყოს სასარგებლო. მაშინ დანარჩენი 20 პროცენტისგანაც „დაიძვრენთ" თავს. ამიტომ არის ამდენად მნიშვნელოვანი ვიტამინებითა და სასარგებლო ნივთიერებებით მდიდარი საკვები პროდუქტების წინასწარ მომარაგება. მათი საშუალებით თქვენ დაიკმაყოფილებთ შიმშილის გრძნობას. შემდეგ კი შეგიძლიათ მიირთვათ ცოტა ტკბილეულიც.

ვმოგზაურობთ და არ ვსუქდებით
მოგზაურობა არა მხოლოდ სიამოვნებაა, არამედ სერიოზული სტრესიც. ამიტომ ხშირად აეროპორტშივე გაწუხებთ საშინელი შიმშილის გრძნობა. თუ როგორ უნდა გაუმკლავდეთ მას ისე, რომ ორგანიზმს არ ავნოთ, უკვე მოგიყევით. ოღონდ ესაა, მიყუჩებულმა სტრესმა შეიძლება კვლავ შეგახსენოთ თავი ფრენის შემდგომაც. თქვენ, რა თქმა უნდა, აპატიებთ თავს უცაბედ სიმსუნაგეს და მხოლოდ ნაციონალური კერძების ჭამას შეუდგებით. რა უნდა იყოს მათში ცუდი? სპაგეტის გარეშე რომში ხომ ისევე წარმოუდგენელია, როგორც თვით რომი –კოლიზეუმის გარეშე. მაგრამ არა. შეზღუდეთ თავი. მიყევით რეჟიმს: საუზმე, სადილი, ვახშამი, რაც უნდა დიდი იყოს ცდუნება იმისა, რომ გზად პიცის „პა-ა-ა-ატარა" ნაჭერი წაისუსნოთ.

კიდევ ერთი საფრთხე – შესაძლოა შინ არასოდეს მოსვლიათ აზრად, რომ საუზმეზე ტორტის ნაჭერი მიგერთვათ, ვახშმად კი – რამდენიმე ძირითადი კერძი ერთად. ხოლო როდესაც თქვენს წინაშეა უგემრიელესი კერძების უსაზღვრო არჩევანი, ძნელია თავის შეკავება. ხსნა მხოლოდ თქვენს ხელთაა. ოტელის გასტრონომიული შემოთავაზებიდან გამომდინარე, შეადგინეთ თქვენთვის ყველაზე ოპტიმალური დიეტა და დაიცავით ის. ჯანსაღი საუზმე, ნოყიერი სადილი , მსუბუქი და ადრიანი ვახშამი – არანაირი სასწაული, ფიგურა კი წესრიგშია.

ძებნა
კალენდარი
«  მარტი 2024  »
ორსამოთხხუთპარშაბკვ
    123
45678910
11121314151617
18192021222324
25262728293031
ჩანაწერების არქივი
საიტის მეგობრები


















Copyright MyCorp © 2024